طول عمرى
بدور على السعادة الحنية البرائة
طول عمرى
كان نفسى يكون لية شخصية
طول عمرى
كان نفسى ان حد يهتم بية
طول عمرى
كان نفسى ان حد يشوفى كويس مش انى تافة و ديما اختياراتى مش بتعجب حد كتير اوى كنت عاوز ابقى شخص تانى غير الى انا علية دلوقتى شخص لة شخصية عارف هو عاوز اية مش بيخاف من اقل حاجة مش بيتجرح من اقل حاجة مش كل الناس شايفها تافة و مش لية اى لزمة فى الحياة مش زمايلة فى المدرسة شايفينة مش ولد اصلا ((افتكرت دلوقتى جملة قالها ليها شخص فى نهاية محادثة بينى و بينى
قلى انة انت مش ليك اى لزمة و اكيد زمايلك الى معاك بيتحرشوا بيك و انت مش بتعرف تعمل حاجة ))
اكتشفت انى طول عمرى
بكدب على نفسى و بقول انا قوى انا مش محتاج حد انا مش عاوز انا هستحمل
لاكن للاسف انا جبان اوى و فى اشد الاحتياج لاى حضن انا طفل ايوة طفل ممكن يخاف من اى فعل غير مقصود و يقرب منك لمجرد ان بسمتك خلتة يحس بالامان معاك
ديما كنت انا الى بقرب من الناس علشان يبقوا اصحابى لاكن للاسف كلهم شايفنى فى الاول و فى الاخر شخص ناقص الرجولة على حد قولهم
طول عمرى
بدور على نفسى فى حد من ناس كتيرة جدا كلمتها كنت لما بلاقى حد مجروح اروح بسرعة اداوية و اقف جمبة و لما الاقى حد وحيد اروح بسرعة بردة علشان مش يحس بالى انا حسيتة انهاردة اكتشفت انى كنت بدور على نفسى في كل الناس و مش لقيتها اكتشفت انى كنت باضحك على نفسى و بقول انى عايش كنت مش بفكر فى نفسى نهائى كنت بفكر فى الى حواليا ممكن حد يحس بية فى يوم و يقولى مالك يااااااااااااااااااااة استنيت الكلمة دة كتير اوى ان حد يقولى مالك او انت لية زعلان لاكن للاسف مفيش حد قالها و لا فى هيقولها
حاولت كتير اوى انى ابقى فى نظرهم راجل لاكن كنت بافشل ديما مش عارف لية طول عمرى بمثل على نفسى و على الناس انى باضحك و كويس و مرح و لطيف و انا من جوايا نفسى اصرخ اوى و اقولهم حسوا بية بقى لية انتم شايفنى كدة
تعبت بجد من التمثيل دة تعبت اوى من دور البليتشو الى بلعبة كل يوم علشان انول رضى اى شخص و يتقبلنى صديق لية
لاكن لكل شىء نهاية انا خلاص زهقت من تمثيل البليتشو و عاوز اكون نفسى و بس شخص لة شخصية لة كيانية مش بيدور على حد يفكر لة و لا ياخد لية قراراتة
يا ترى هقدر و لا هفشل زى كل مرة !!!!!!!!!!!!!!!!!!!!!!
